學訂立僱傭合約維繫良好勞資關係

細閱新聞，不難發現常常都有拖欠薪金或對公司所提供的福利有誤解的案件，惡劣的勞資關係，最差的情況是打官司，在法庭碰面。要避免令僱主與僱員間的關係緊張化，在最初訂立僱傭合約時，詳細清晰列出雙方間的工作性質、工資及福利等細項，可保障雙方的權益。青協生活學院開辦了僱傭合約編寫課程，適合僱主、人事部、管理層及創業人士報讀，了解更多訂立合約的技巧，可減少大家在日後合作上發生誤會的機會。

Kik（i 右）表示制定僱傭合約，有助減低日後合作有機會出現的誤會，「僱傭關係好，工作士氣都相對提高。簽合約時，僱主可以就重要細項向僱員解釋，僱員亦可就不理解嘅問題發問，確保雙方都明白先簽約。」

課程由處理勞資糾紛經驗豐富的Kiki（何珮琪小姐）導師任教，她曾處理過超過100宗上庭及勞工處的勞資糾紛個案，她會在課程中對學員簡介勞工法例，加強他們的基礎知識，「課程主要分為3個範疇，首先會講解冇效嘅合約例子，好似有啲公司規定員工每年只可以有24日病假，就算員工簽咗，超過24日而員工真係病兼有醫生紙，都一定要畀員工放，唔批就係唔合乎勞工法例。」

Kiki表示很多初踏職場的新鮮人，都不太清楚辭職的通知期，「以有3個月試用期嘅工種為例，試用期嘅第一個月內，員工可即時通知即刻走；喺工作1個月後，員工需於最少7日前通知；過咗試用期後，則視乎僱傭合約列明嘅通知期而定，如果列明要1個月，就要喺1個月前通知。」

針對不正當行為

第二個範疇會教學員針對不正當行為，去編寫合約細項，Kiki表示：「我遇過最多老闆會問，有關員工遲到問題可以點處理。一開始訂立合約時，可以寫明員工遲到，公司會發警告信，當收取警告信超過3封，情況又冇改善，則可以即時解僱，而唔需要賠償。如果情況有改善，就唔可以即炒。」

打工仔最關心是有沒有加班費，Kiki說：「OT嘅計算方法，合約要寫明OT要喺老闆批准嘅情況下進行及工作幾耐先計作加班，例如額外工作1小時以上先當作OT。」

第三個範疇，Kiki會講解限制性條款，指僱主可在合約上訂立一些便利員工的項目，「現時好多員工需要照顧家庭成員，僱主可以在合約中列明制定家庭友善計劃，畀員工獲得彈性上班時間嘅安排，可分批上班，方便到員工喺照顧家人上嘅時間分配。」

Kiki表示遇過有公司規定僱員一年只可有24日病假，有僱員問，若已請病假達24日，但又真的病了，難道要帶病上班？Kiki說：「僱傭合約係講求合理性，就算員工簽咗合約，但佢有醫生紙證明生病，僱主都一定要批，唔批就係唔合乎勞工法例。」

通知期要清楚

然而，Kiki指員工通常對自身的工時、薪金計算方法、加班計錢與否及通知期的瞭解不深，所以她在上課時都會講解，「根據僱傭條例第44條，員工喺入職時要知道自己嘅工資、工資期及通知期，所以喺制定僱傭合約時要特別留意。工資期係指每個月嘅工作期，例如每月1號至30號，僱主需喺工資期完結後7日內出糧畀員工。」清晰的條文，可以減少僱主與僱員的爭議。

學員KY表示：「我從事公關行業，有時喺工作上會遇到勞工法例及僱傭合約嘅問題，但未必對所有細項有詳細嘅認識，亦唔知道可以訂定乜嘢嘅條款，及相關字眼要點用。為咗將來可以清晰解答僱員提出嘅問題，所以我報讀呢個課程，希望可以了解多啲。」